دليل طالب الطب في التعامل مع الروتين

بسم الله الرحمن الرحيم

عشان تريح نفسك .. أما نهاية الامتياز تقرب .. هات دوسية بلاستيك بكبسونة .. وحط فيه الآتي:
- 5 نسخ من أصل شهادة الميلاد (الواحدة بـ 7 جنيه من المركز اللي في شارع الحلو مع حسن رضوان أو أي مكان شبهه .. يبقى كده 35 جنيه).
- 20 صورة لبطاقتك الشخصية (بـ5 جنيه). 
- بطاقة 6 جند .. طب لو ضاعت منك؟ بتطلع بديل لها حاجتين:
1- الثلاثي العسكري - تأكيد بيانات دي فيها بيانات الـ6 جند (ورقة بيضا من السجل المدني اللي أدام الاستاد .. بـ... جنيه) .. ودي كفاية في تأجيل التجنيد.
2- 7 جند (ورقة صفرا من مديرية أمن الغربية اللي في شارع النادي .. بنص جنيه) .. ودي مهمة في التقديم للكشف الطبي.


مواقع مهمة
مديرية صحة الغربية: خد شارع البحر لحد أحمد ماهر .. وخد أحمد ماهر لحد ميدان الساعة واكسر يمين .. امشي طوالي لحد ما تلاقي المديرية على إيدك الشمال عالناصية.
الإدارة الصحية بطنطا: خد شارع سعيد لحد الملجأ وخد الشارع اللي على ناصيته الملجأ باتجاه الحلو .. المديرية على إيدك اليمين .. أو خد الحلو لحد صيدلية شلتوت ومحلات أبو العز للحبوب واكسر الناصية دي باتجاه سعيد .. هتلاقي المديرية على إيدك الشمال.
منطقة التجنيد: خد شارع النادي لحد السريع واكسر شمال وعدي سوق الجملة طوالي لحد السكة الحديد .. اكسر شمال وعدي السكة الحديد تلاقي التجنيد في وشك.

(1)

قصة التقديم للنيابات (وظائف الجامعة)

1- شهادة بكالوريوس الطب والجراحة موضحاً بها التقدير العام ومجموع درجات البكالوريوس.
2- شهادة بيان تقدير سنوات الدراسة موضحاً بها التقدير العام وتقدير مادة التخصص.
3- شهادة بأداء فترة الامتياز لمدة سنة على الأقل موضحاً بها الأقسام التي تدرب فيها ومدتها.
دول 3 شهادات بتعملهم في شئون الطلاب اللي في الكلية وبتاخدهم بعد كام يوم، ملكش دعوة بالتفاصيل المكتوبة دي .. المهم إنهم 3 شهادات وهما فاهمين هما بيعملوا إيه .. بـ ... جنيه.

4- استمارة رغبات (دي من شئون الأطباء اللي في العيادة الشاملة، وفيها 33 رغبة بعدد أقسام الكلية .. ببلاش).
5- 
5- موافقة جهة العمل على التقدم للإعلان (ده من مديرية الصحة .. ببلاش).

6- عدد 6 صور شخصية.

7- أصل شهادة الميلاد أو مستخرج رسمي منها.


8- الموقف من التجنيد (ده من منطقة التجنيد طبعاً .. ببلاش).
9- صحيفة الحالة الجنائية (فيش يعني، موجه لكلية الطب ومستشفياتها الجامعية وده من القسم، بس خد بالك إن الفيش العادي بيقعد 7 أيام عما تاخده، يعني لو عامله الخميس هتاخد الأربع .. والواحد بـ6 جنيه .. فلو وقتك كان ضيق اعمل الفيش الإلكتروني بتاخده بعد يوم تقريباً .. بس الواحد بـ ... جنيه).

هتجمع حاجاتك دي كلها وتروح بيها مكتب البريد وليكن اللي في المجمع ورا كلية الطب .. هتاخد منه ظرف كبير بتكتب على ناحية بيانات (لإنك انت المُرْسِل .. اللي باعت يعني) .. وعالناحية التانية في فراغات للمرسل إليه .. ملكش دعوة بيها .. فوق الفراغات دي في مساحة فاضية .. اكتب فيها الصيغة دي تحت بعضها كده:
جامعة طنطا

الإدارة العامة للمستشفيات الجامعية

إدارة شئون الأطباء

السيد الأستاذ الدكتور/ عميد كلية الطب ورئيس مجلس إدارة المستشفيات الجامعية

مسابقة الأطباء المقيمين

خلصت كده .. هتدي لبتاع البريد 10 جنيه .. وهيديك ورقة فاضية تكتب على ناحية منها اسمك وعنوانك (كمرسل) .. وعالناحية التانية المرسل إليه .. هو نفس الاصطمبة اللي فوق دي .. وهياخد منك الظرف ويديك وصل .. بعد 3 أيام تسأل في شئون الأطباء تشوف ظرفك وصل ولا لأ.

 (2)

 قصة تأجيل التجنيد والتجنيد نفسه

دلوقتي يا مصري انت بتقعد تأجل التجنيد من أول ما تخلص الامتياز لحد ما تكشف وتشوف إذا كنت هتخش الجيش ولا لأ .. المهم .. التأجيل بيبقى عن طريق منطقة التجنيد .. بتاخد معاك 3 حاجات:
1- شهادة البكالوريوس الموجهة لمنطقة التجنيد.
2- شهادة الامتياز الموجهة لمنطقة التجنيد.
3- 6 جند.

تروح التجنيد وتاخد من هناك خطاب اسمه: تحديد موقف التجنيد وتملاه .. وممكن تحتاج في الزيارة الواحدة لمنطقة التجنيد إنك تعمل كذا خطاب تحديد موقف .. مثلاً واحد للتكليف وواحد للتقديم في نيابة الجامعة .. المهم .. اتعود إنك تعمل اتنين عالأقل.
بتاخد الخطاب ده وتملى بياناته .. وتروح بيه على كشك في وسط منطقة التجنيد كده .. وتديه للي قاعد فيه مع الشهادتين .. يقوم كاتبلك اليوم اللي اتأجلت له .. وبتاخد الخطابين اللي عملتهم وتروح بيهم لمكان تاني عشان الختم .. بس كده.


في بيان بتملاه اسمه الرقم الثلاثي هتلاقيه في 6 جند أو البديل بتاعها.

انت بتأجل مرة لشهر 3 ومرة لشهر 4 ومرة لشهر 7 .. وبعد كده لو انت نص أول (يعني من مواليد أول 6 شهور في السنة أياً كان سنك) هتأجل لشهر 8 .. وساعتها هيبقى مطلوب منك إنك تستعد للكشف الطبي .. طب إيه الورق المطلوب؟ خد عندك:
1- صورة البطاقة.
2- 3 صور شخصية (الملتحي يروح لأي استودية يشيله الدقن من الصورة).
3- أصل شهادة الميلاد.
4- فصيلة الدم (لازم شهادة معتمدة شهادة معتمدة).

5- شهادة البكالوريوس الموجهة لمنطقة التجنيد. 
6- شهادة الامتياز الموجهة لمنطقة التجنيد.
7- 6 جند أو البديل بتاعها.

 في نهاية الكشف الطبي بتاخد استمارة 110 .. صورها 4 نسخ مثلاً وعينهم عندك لإن دي مهمة جداً.

(3)

إخطار الوحدة أو الجامعة بموقفك التجنيدي

 دلوقتي انت أجلت التجنيد أو رحت كشفت وخدت 110 .. محتاج تعلم الوحدة بموقف الجديد عشان تفضل مسجل على قوتها وتقبض المرتب.

بتاخد استمارة التأجل أو صورة من 110 وتروح المديرية (ميديرية الشئون الصحية بالغربية - ش عثمان محمد) وتطلع لمكتب التجنيد وتديله الورقة اللي معاك .. هيمشورك شوية وفي الآخر يديك ورقة تروح بيها الإدارة الصحية.
هتروح الإدارة الصحية (ش سعيد في الشارع اللي حنب الملجأ) بالورقة دي وتطلع لشئون الأطباء في الدور الأول علطول .. هيمشورك شوية برده وفي الآخر يديك ورقة تروح بيها الوحدة.